神耆小子丨尹詩沛零包袱「大Red唇」擒攬啜蕭正楠　與朱斐斐街頭MMA打到落地

TVB《神耆小子》在昨晚（5月20日）內，飾演魯娟的尹詩沛（Nicole）演出非常搶焦。劇情講魯娟對阿勇（蕭正楠飾）展開猛烈追求、並設局約會阿勇共進晚餐；平時多以「四眼馬尾」宅女造型示人的魯姑娘，特意悉心打扮化濃妝和換上Bling Bling低胸連身裙，惟「大Red」Look嚇親阿勇。

後來，魯姑娘藉住酒意當街攬住阿勇都不特止，更乘機嘟起「大Red唇」意圖啜爆阿勇，眼明手快的阿勇即時左閃右避，混亂間魯姑娘不慎倒地，場面搞笑。

▼點擊圖片放大

+10

+9

爭男神上演「街頭MMA」

之後，慘遭阿勇拒絕的魯姑娘到胸圍店買新Bra，打算重整旗鼓扮靚啲攻陷阿勇的心，豈料期間撞正死對頭珍珠（朱斐斐飾），珍珠寸爆魯姑娘說：「你B（Cup）咁Cute呀，我個胸又唔聽話喇，之前着開個Size唔啱喇，依家要A、B、C、E呀！」

被寸的魯姑娘心有不甘，與珍珠上演「街頭MMA」，互扯頭髮兼互相推撞，更搞到成地都係Bra，兩人最終打到仆落地，魯姑娘更碌出馬路差點被車撞。

▲ 珍珠與魯姑娘上演「街頭MMA」。

蕭正楠忍唔到笑

對於Nicole飾演的傻更更魯姑娘，不少網友覺得她既單純又可愛，形象討好兼入屋，亦有網友指現實中的Nicole是索女一名，今次收埋靚樣扮宅女，認真大犧牲。

Nicole受訪時笑言：「唔覺得魯姑娘係一個醜角，佢係一個比較樸素、好簡單同埋好專一嘅女仔。」講到與阿蕭合作，Nicole笑言：「同阿蕭拍嘢好衰㗎，佢份人好搞笑，但又成日忍唔住笑，所以因為忍笑搞到成日NG。」

▲ 尹詩沛為戲劇有最好效果，零包袱演出。

尹詩沛意外咁多動作戲 

談到昨晚一集連續仆落地兩次，Nicole笑言：「估唔到呢套喜劇出奇地多動作場口，今次應該係仆得最多次數嘅一套劇！」

Nicole又謂，很喜歡與斐斐撈亂骨頭這條線：「我哋兩個一見到面就好多鬥嘴，又成日畀佢用身材撻我，我又經常毫無還擊之力。」

▲ 珍珠經常取笑魯姑娘身材差。

全素顏上陣

另外，Nicole還透露與斐斐街頭激戰的花絮：「去到現場先同斐斐度動作，女人打交通常都係扯頭髮同扯吓啲衫，但佢實在（著得）太少布，唔可以扯佢啲衫，因為太容易走光，同埋佢咁少布撻落地，都好驚佢整親。」

同時，Nicole預告今晚（5月21日）將全素顏上陣，說：「呢場戲係講Kelly（傅嘉莉）教我扮靚，因為佢會幫我塊面推油，所以就連粉底都冇得搽，為咗配合番嗰場戲，最後都係全素顏上陣。」

▲ 尹詩沛素顏上陣演出。

唱歌演戲樣樣得
 
其實Nicole演戲一向搏盡，而且雖然是配角但往往比主角更搶鏡。在2010年入讀第24期無綫電視藝員訓練班的她，畢業後成為演員，但角色不起眼，至2015年在綜藝節目《今晚睇李》擔任「Palwerful Band」和音之一，因唱功了得而廣為人知。

到2019年在《金宵大廈》中演舞女芳芳，與莎莎（阮兒飾）的一段Sheshe戀情感動觀眾，憑實力獲觀眾注意。到翌年《十八年後的終極告白》演「豬肉娣」更是大騷演技，幾乎每次出場鋒芒蓋過其他演員，令觀眾刮目相看。

過往，觀眾覺得Nicole擅長演悲劇或嚴肅角色，到去年在《羅密歐與祝英台》演火爆姐，不斷向陳豪施展姣功，喜感不俗。不過火爆姐還是風塵味較重角色，到《神耆小子》更完全是是傻頭傻腦的角色，盡現Nicole多方面的演繹能力。

▼點擊圖片放大

+6

+5

最新影片推介：方太專訪

HKET App已全面升級，TOPick為大家推出一系列親子、健康、娛樂、港聞及休閒生活資訊及影片。立即下載︰https://onelink.to/f92q4m

追蹤TOPick WhatsApp頻道睇最新資訊︰http://tinyurl.com/3dtnw8f5